المساعد الشخصي الرقمي

مشاهدة النسخة كاملة : معاناة مطلقة


الزول
16-04-2009, 02:27
عكاظ
معاناة مطلقة

كنت جالس في مكتبي وشويه دق التلفون رفعت السماعة وقلت الوو إلا واسمع صوت خااافت باااكي بيقولي أنت أبو فتو؟ ايوه أنا أبو فتو بلحمه وشحمه.
ردت وقالت بصوت متقطع ممكن تخلي بالك معايا وتسمعني.. طيب ممكن بس تستهدي بالله وتصلي على النبي وتسيبيكي من البكى ده عشان أقدر اسمعك زي الناس.. سكتت شويه ورجعت اتكلمت وقالت ليش نظرة المجتمع للمطلقة قاسية؟ حتى الأهل بينظروا لها نظرة احتقار وازدراء كأنها ارتكبت جريمة نحنا ايش سوينا عشان يكون ده حالنا ومصيرنا؟ حرام عليكم عشانكم رجال خلاص صرتووا ملائكة.. يابنت الناس ايش في فهميني؟ حقولك قصتي بس ابغاك تسمعني للنهاية
حسمعك ياستي للنهاية... تزوجت وعمري 17 سنة وعشت مع زوجي حياة كلها نكد في نكد وصبرت وتحملت عشان ولدي وبنتي لكن ما قدرت اتحمل اكتر من كده طلبت الطلاق وحرمني من شوفة بنتي وولدي لانه نقل لمنطقة تانية وصرت بس اكلمهم بالتلفون بعد كده تزوجت من رجل تاني وكان متزوج وكان غني لكنه بخيل بالمرة لكن لعنة الطلاق برضها طاردتني وياريت البخيل ده طلق مجانا الا طلب مني ارجع له مهره ومافي داعي اقولك كم مهره لانه مبلغ يضحك المهم بعد كده جاني ولد عمي وتزوجني رغم انه متزوج وقال بعظمة لسانه محد حيحافظ على بنت عمي ولا أحد ح يرعاها غيري انا وخدلك من الكلام المعسول حقو.. المهم عشت معاه وكان لما بيتخاصم مع زوجته يجي عندي ما كان عنده عدل ولا خوف من الله حتى تغييير أثاث البيت يعطيها الجديد ويعطيني القديم اللي كان مفروش عندها المهم كثرت المشاكل بينه وبين زوجته بسببي وطلقني بعد ما جاب مني توأم هدا غير اني حامل منه في شهري الأخير بعد كده رحت عشت في بيت اخويا المتزوج لاني يتيمة الأب والأم اخويا كان ينظر ليا نظرة احتقار لاني مطلقة وهدا الشي عيب في نظره وبيعتبرني كأني قنبلة موقوتة.. محرومة من الضحك محرومة من الخروج محرومة من زياره صحباتي حتى لما اكلم أولادي بالتلفون لازم يكون جنبي يفتكرني اعاكس هدا غير المعاملة السيئة اللي بحصلها من زوجة أخويا لا وازيدك كمان لما يجبلي راتب التقاعد حق أبويا يأخد منه قيمة ايجار الغرفة اللي أنا ساكنه فيها رغم انه موظف راتبه طيب بدل ما يجيني كل شهر ويقولي خدي كمان ده مصروف زياده يساعدك على الحياة الكريمة... هادي قصتي وهادي معاناتي ورجعت تبكي وقفلت السماعة... قلت في نفسي الله يعينك ويساعدك على اللي انتي فيه وكل اللي اتمناه انه المجتمع يغير نظرته للمطلقة ورفقا بالقوارير يللي بيقولوا عليكم رجاجيل وعيشووا كتييييير تشوفوا كتييييير.


فتحي حلواني
( الجمعة 14/04/1430هـ ) 10/ أبريل/2009 العدد : 2854